(မြန်မာ့စီးပွားရေးနှင့် ပညာရေး @ Mizzima Media အင်တာဗျူး)

 (မြန်မာ့စီးပွားရေးနှင့် ပညာရေး @ Mizzima Media အင်တာဗျူး)

(မေး)။          ။ လက်ရှိအပြောင်းအလဲမှာ မြန်မာ့စီးပွားရေး SMEs လုပ်ငန်းများ ဖွံ့ဖြိုးတိုးတက်မှုနဲ့ပတ်သတ်ပြီး ယခင်အခြေအနေနဲ့ ယခုဖြစ်လာနိုင်ချေရှိတဲ့ SMEs လုပ်ငန်းများအတွက် အလားအလာများကို ဆရာ့အနေနဲ့ အကြံပြုဆွေးနွေးပေးစေလိုပါတယ်။

(ဖြေ) Mizzima Media ကို ယခုလိုအများပြည်သူအတွက် အင်တာဗျူးလာရောက်ပေးတဲ့အတွက် အားလုံးကိုယ်စား ဦးစွာကျေးဇူးတင်ကြောင်းပြောကြားလိုပါတယ်။ လက်ရှိအနေအထားမှာ အားလုံးသိတဲ့အတိုင်း အမေစု NLD အစိုးရသစ်တက်လာတဲ့အခါမှာ များစွာတိုးတက်ပြောင်းလဲလာနိုင်ဖို့ကို အားလုံးသုံးသပ်နိုင်မှာဖြစ်ပါတယ်။ အမေစုရဲ့နိုင်ငံခြားရေးအဆက်အသွယ်နဲ့ ခန့်မှန်းလို့မရတဲ့ မဟာဗျူဟာတွေ၊ အကြံညာဏ်ကောင်းတွေဟာ များစွာတိုးတက်လာဖို့ကိုယုံကြည်ပါတယ်။ ကျွန်တော့်အနေနဲ့တော့ ပြည်သူထဲက ပြည်သူတစ်ယောက်အနေနဲ့ လက်ရှိကြုံနေရတဲ့ စီးပွားရေးအခြေအနေတွေ၊ ဖြစ်သင့်တဲ့အချက်တွေပေါ် အားလုံးကိုယ်စား ဆွေးနွေးပေးချင်ပါတယ်။

မြန်မာနိုင်ငံတိုးတက်ဖို့ဆိုရင် SMEs လုပ်ငန်းများနဲ့ စီးပွားရေးဖွံ့ဖြိုးတိုးတက်မှုဟာလည်း လွန်စာအရေးကြီးပါတယ်။ ယခင်အစိုးရလက်ထက်မှာ အားလုံးသိတဲ့အတိုင်း ပံ့ပိုးကူညီမှုတွေ၊ ပြုပြောင်းပြောင်းလဲမှုတွေရှိခဲ့သော်လည်း တိုးတက်မှုအတွက်ရာ များစွာဆက်လက်ဆောင်ရွက်ရအုံးမှာဖြစ်ပါတယ်။ ဥပမာ ငွေကြေးချေးယူတဲ့ အနေအထားကို သုံးသပ်ကြည့်ရင်၊ လုပ်ငန်းကြီးတွေလောက်ပဲ ချေးငွေတွေကို ရရှိနိုင်ပြီး၊ လုပ်ငန်းအငယ်တွေမှာ ပံ့ပိုးမှုတွေ၊ ကူညီပေးမှုတွေဟာ မရသလောက်ဖြစ်ခဲ့တာတွေလည်းရှိပါတယ်။ လက်ရှိအနေအထားမှာ ဆရာတို့သိသလောက်တော့ SMEs လုပ်ငန်းများအတွက် JICA မှတဆင့် 2-step Loan ပုံစံနဲ့ (5 Billion $) ထုတ်ချေးပေးမှုတွေ၊ CGI စနစ်စတင်မှုတွေ၊ ဆက်လက်ပြီး နောက်ပိုင်းမှာ World Bank နဲ့အတူ UNDP စတဲ့အဖွဲ့အစည်းတွေမှ တဆင့်လည်း SMEs လုပ်ငန်းများကို ဆက်လက်ပံ့ပိုးပေးမယ်လို့သိရပါတယ်။

NLD အစိုးရသစ်လက်ထက်မှာလည်း နိုင်ငံတကာအကူအညီတွေ၊ ပံ့ပိုးမှုတွေ၊ ချိတ်ဆက်ဆောင်ရွက်မှုတွေဟာလည်း များစွာဖြစ်လာဦးမှာပါ။ ဒီအခါမှာ ဆရာတို့အနေနဲ့ဖြစ်စေချင်တာတော့ SMEs အားလုံးကိုခြုံငုံစဉ်းစားစေချင်ပါတယ်။ စီးပွားရေးလုပ်ငန်းများ အားလုံးထဲမှာမှတဆင့် ဘယ်လုပ်ငန်းတွေကို ဦးစားပေးရမလဲ၊ ဘယ်စီးပွားရေးလုပ်ငန်းတွေကို အဓိကထားပံ့ပိုးပေးမလဲဆိုတာကို သိဖို့ဆိုရင် စာရင်းဇယားတွေ၊ လက်ရှိအချက်အလက်အမှန်တွေကို Survey ပြန်လုပ်ဖို့တော့လိုပါလိမ့်မယ်… (ဆက်လက်ဖော်ပြပေးသွားပါမည်)

 

(မေး) ။ မြန်မာနိုင်ငံရဲ့ပညာရေးဟာလည်း နိုင်ငံတကာနဲ့ယဉ်လိုက်ရင် များစွာနိမ့်ကျနေတယ်ပေါ့လေ၊ ဒီအခါမှာ အစိုးရသစ်လက်ထက်မှာ အမေစုပညာရေးဝန်ကြီးဖြစ်လာတာနဲ့အတူ ပညာရေးနဲ့ပတ်သတ်ပြီး ဆရာ့ရဲ့ အကြံပေးချက်များကိုလည်း တင်ပြပေးစေလိုပါတယ်။

 

(ဖြေ) ။ Education for All ပေါ့နော်၊ ပညာရေးဟာ အားလုံးတိုးတက်ဖို့အတွက် အဓိကအုတ်မြစ်တွေဖြစ်ပါတယ်။ လူသားတွေဟာ အတူတူပါပဲ၊ သို့သော် အသိပညာတွေကွာခြားပြီး၊ ပြုမှုဆောင်ရွက်မှုတွေ ကွဲလွဲသွားတာဖြစ်ပါတယ်။ နိုင်ငံတခုတိုးတက်ဖို့ဆိုရာမှာ တဦးချင်းရဲ့ အသိပညာတက်မြောက်မှုနဲ့တိုင်းတာလို့ရပါတယ်။ အားလုံးသိတဲ့အတိုင်းပဲ မြန်မာ့ပညာရေးမှာလည်း များစွာတော့ ပြင်ရအုံးမှာဖြစ်ပါတယ်။ လက်ရှိပညာရေးပုံစံကတော့ Top-down ပုံစံပေါ့နော်၊ အပေါ်ကချမှတ်ထားတဲ့အတိုင်းပဲ လိုလိုမလိုလိုသင်နေတာတွေ့ရတယ်။ ဖြစ်သင့်တာတော့ Bottom-up စနစ်ကိုအားပေးပါတယ်။ ပညာသင်ပေးတယ်ဆိုတာ သင်ကြားတဲ့ဆရာတက်သိဖို့ထက်၊ သင်ကြားခံရတဲ့ တပည့်တွေ အသိပညာရရှိဖို့လိုအပ်ပါတယ်။ ဒီအခါမှာ အောက်ခြေမှာဘာတွေလိုအပ်နေလဲဆိုတာကို အခြေခံပြီး သင်ပေးဖို့တော့ လိုအပ်တာပေါ့။ လက်ရှိမြန်မာနိုင်ငံရဲ့ပညာရေးဟာ နိုင်ငံတကာနဲ့ယှဉ်လိုက်ရင် များစွာရှုပ်ထွေးပြီး၊ လက်တွေ့နယ်ပယ်အတွက် အသုံးပြုနိုင်တဲ့အနေအထားမှာ အားနယ်တာတွေ့ရပါတယ်။ ဥပမာ - မြန်မာစာဘွဲ့၊ အင်္ဂလိပ်စာဘွဲ့ စသဖြင့် ပြီးရင်ဘာလုပ်မလဲ ရလဒ်ကောင်းဖြစ်ဖို့နဲ့ အသက်မွေးဝမ်းကြောင်းအတွက် အာမခံချက်ရှိတဲ့ ပညာရေးဖြစ်ဖို့လိုတာပေါ့။ နိုင်ငံခြားမှာတော့ ရှင်းပါတယ်။ Vocational Education ကိုအားပေးပြီး၊ လက်တွေ့နယ်ပယ်ကိုလည်း လက်တွေ့သင်ကြားပေးမှုနဲ့အတူ ကျောင်းပြီးရင်လည်း အသက်မွေးဝမ်းပညာရေးဖြစ်လိုပ အချိန်ကုန်ပေမဲ့ အကျိုးရှိစေပါတယ်။

အမေစု ပညာရေးဝန်ကြီးဖြစ်လာရင်တော့ ပညာရေးဟာ များစွာတိုးတက်လာမှာဖြစ်ပါတယ်။ နိုင်ငံတကာမှ ပညာရေးကျောင်းတွေဟာလည်း ပံ့ပိုးကူညီမှုရလာနိုင်မှာဖြစ်ပါတယ်။ ဆရာတို့အနေနဲ့ အကြံပြုချင်တာတော့ ပညာရေးမြင့်မားဖို့အတွက် ပြည်တွင်းမှပညာရှင်တွေ၊ ပြည်ပမှ နိုင်ငံတကာရောက် မြန်မာ့ပညာရှင်တွေကိုလည်း ပါဝင်လာစေချင်တယ်။ ဆရာတို့သိရသလောက် နိုင်ငံခြားရောက်မြန်မာတွေဟာ (၃-သန်း မှ ၅-သန်း) လောက်ရှိတယ်လို့ဆိုပါတယ်။ ဒါဟာ ကြီးမားတဲ့ အခွင့်အရေးပါ၊ နိုင်ငံတကာမှ မျိုးစုံသော အသိပညာ၊ အတွေ့အကြုံတွေကို ရရှိနိုင်အောင် ကြိုးစားကြည့်ရမှာဖြစ်ပါတယ်။ မြန်မာနိုင်ငံကို ပြန်လာပါလို့ ဆရာတို့မဆိုလိုပါဘူး၊ အားလုံးဟာ အထိုင်ကျပြီးသားဖြစ်နေတော့လေ၊ သို့သော်လည်း ထိုနိုင်ငံမှာပဲနေရင်း တိုးတက်ရာတိုးတက်မှုအတွက် အကြံပေးတာဖြစ်ဖြစ်၊ စီးပွားရေးချိတ်ဆက်ပေးတာဖြစ်ဖြစ်၊ နိုင်ငံအတွက် တခုခုအကျိုးပြုပေးနိုင်ရင်တော့ များစွာတိုးတက်လာဖို့မျှော်လင့်ပါတယ်။ ဥပမာနိုင်ငံခြားမှာ အသင်းအဖွဲ့တွေဖွဲ့စည်းပေးတာမျိုး ကြိုးစားကြည့်စေချင်ပါတယ် ဒါဆိုရင် နိုင်ငံတကာမှ အတက်ပညာတွေ၊ အတွေ့အကြုံတွေ၊ နည်းပညာတွေဟာ နိုင်ငံလက်ရှိအပြောင်းအလဲမှာ များစွာအကျိုးပြုပေးနိုင်မှာဖြစ်ပါတယ်။ …(ဆက်လက်ဖော်ပြပေးသွားပါမည်)

 

(မေး) ။ မြန်မာနိုင်ငံ စီးပွားရေးဖွံ့ဖြိုးတိုးတက်မှုအတွက် အကြံပြုချက်များကိုလည်း ဖော်ပြပေးစေချင်ပါတယ်။

(ဖြေ) ။ နိုင်ငံစီးပွားရေး ဖွံ့ဖြိုးတိုးတက်ဖို့ဆိုရာမှာ အားလုံးကို ခြုံငုံစဉ်းစားတဲ့ Public Private Partnership (P.P.P) အစိုးရ၊ ပုဂ္ဂလိက၊ ပြည်သူ အားလုံးပါဝင်တဲ့ စီးပွားရေးပုံစံဖော်ဆောင်နိုင်ဖို့ လိုအပ်ပါတယ်။ အားလုံးထဲမှာမှ ဘယ်အချက်တွေကို ဦးစားပေးဖော်ဆောင်မလဲ ဆိုတာနဲ့အတူ Political Goal နိုင်ငံရေးမျှော်မှန်းချက်၊ Economical Goal စီးပွားရေးပန်းတိုင်၊ Social Goal ပြည်သူတွေရဲ့ မျှော်မှန်းချက်ပန်းတိုင်တွေဟာ အသီးသီးထားရှိရမှာဖြစ်ပါတယ်။ ပန်းတိုင်တခုကို ဦးတည်ဖော်ဆောင်မှသာ တိုးတက်မှုဆိုတာသေချာဖြစ်လာနိုင်မှာပါ။

မြန်မာနိုင်ငံတိုးတက်ဖို့အတွက် နိုင်ငံခြားမှာရောက်နေတဲ့ နိုင်ငံတကာအတွေ့အကြုံရှိတဲ့ မြန်မာနိုင်ငံသားတွေဟာလည်း ပါဝင်ကူညီပေးဖို့လိုအပ်မှာဖြစ်ပါတယ်။ နိုင်ငံတကာမှာ သုံးနေတဲ့ နည်းပညာတွေ၊ စနစ်ကောင်းတွေ၊ အတွေ့အကြုံတွေဟာ မြန်မာ့အပြောင်းအလဲအတွက်တော့ တကယ်ကိုအသုံးဝင်စေနိုင်တဲ့ တန်ဖိုးတရားတွေဖြစ်ပါတယ်။ ဒီအတွက်လည်း လုပ်ပိုင်ခွင့်တွေ၊ စီစဉ်ဆောင်ရွက်မှုတွေကို တာဝန်ရှိသူတွေ၊ ဦးဆောင်နိုင်သူတွေက ကြိုးစားကြည့်ရမှာဖြစ်ပါတယ်။

ပြည်တွင်းမှာကြုံနေတဲ့ ငွေကြေးအခက်အခဲပြဿနာအတွက်လည်း ဘဏ်တွေမှာထားတဲ့ ငွေသေတွေကို စီးပွားရေးမှာ အသုံးချနိုင်ဖို့၊ နိုင်ငံတကာမှ ရင်းနှီးမြုပ်နှံမှုအကူအညီနဲ့ ပြည်တွင်းငွေကြေးစီးဆင်းမှုများဖန်တီးပေးနိုင်ဖို့နဲ့၊ ပုံမှန်ဝင်ငွေရှိတဲ့ လူလတ်တန်းစားပြည်သူများအတွက် နိုင်ငံတကာမှာသုံးသလိုမျိုး Credit ကဒ်တွေနဲ့ စက္ကူကိုငွေအဖြစ်ဖော်ဆောင်ဖန်တီးပေးတဲ့ လုပ်ငန်းမျိုးတွေရှိလာရင် ငွေကြေးစီးဆင်းမှုများပြားလာပြီး နိုင်ငံကြွယ်ဝချမ်းသာလာမှာဖြစ်ပါတယ်။ 

နိုင်ငံစီးပွားရေးတိုးတက်လာတာနဲ့အမျှ အလုပ်အကိုင်အခွင့်အလမ်းတွေ၊ ငွေကြေးအခွင့်အလမ်းတွေ၊ စီးပွားရေးအခွင့်အလမ်းတွေဟာ ဒွန်တွဲပါလာနိုင်ပြီး ပေးလာတဲ့ အခွင့်အလမ်းတွေကို ပိုင်ဆိုင်နိုင်ဖို့တော့ အဆင့်သင့်ပြင်ဆင်ထားမှုသည်သာ တိုးတက်မှုကို ဖော်ဆောင်နိုင်မှာဖြစ်ပါတယ်။ ဒါကြောင့် အကြံပြုချင်တာကတော့ ဂျပန်နိုင်ငံမှာ ကျင့်သုံးခဲ့တဲ့တိုးတက်ရေးလမ်းစဉ်ဖြစ်တဲ့ ယနေ့ထက်-မနက်ဖြန်သည် ပိုမိုကောင်းမွန်အောင် ကြိုးစားကြရမည်ဆိုတဲ့ ပြည်သူအားလုံးအတွက် အားပေးထုတ်လွှင့်မှုအစီအစဉ်တွေဟာ လိုအပ်လာနိုင်ပြီး၊ နိုင်ငံသားအားလုံးမှ တူညီစွာဖြစ်ချင်နေကြတဲ့ မြန်မာနိုင်ငံဖွံ့ဖြိုးတိုးတက်ရေးအတွက် ဘက်စုံမှ တာဝန်သိသိ၊ တာဝန်ရှိရှိကြိုးစားခြင်းဖြင့် ပိုမိုတိုးတက်သော မြန်မာနိုင်ငံဖြစ်လာနိုင်အရေး အားလုံးပါဝင်ဖန်တီးဖော်ဆောင်နိုင်ဖို့ နိဂုံးချုပ်ဆွေးနွေးတင်ပြအပ်ပါတယ်။ 

စတဲ့ အင်တာဗျူးသုံးသပ်ချက်များအား Mizzima Media တွင်၎င်း၊ www.EntrepreneurSME.com ၀ဘ်ဆိုဒ်တွင်၎င်း အသေးစိတ် စီစဉ်ဖော်ပြပေးသွားမည်ဖြစ်ပါသည်။ စိတ်ဝင်တစားဖတ်ရှုပေးသူ မိဘပြည်သူအားလုံး ကိုယ်စိတ်နှစ်ဖြာ ကျန်းမာချမ်းသာပြီး နိုင်ငံတိုးတက်ပြောင်းလဲရေးအတွက် တဖက်တလှမ်းမှ ပါဝင်ဆောင်ရွက်ရင်း အများအကျိုးတိုးတက်စေဖို့ ဆောင်ရွက်ပေးနိုင်ကြပါစေ။

စီးပွားရေးအကြံပေး - ဦးဇင်ဖြိုးပိုင် (Founder - www.EntrepreneurSME.com ) မှ အင်တာဗျူးဖြေဆိုထားသည်။

စီးပွားရေးဆိုင်ရာ အင်တာဗျူးများအား MRTV-4, Mizzima Media, MCN, ပြည်မြန်မာ, City FM, ရတနာပုံသတင်းစဉ်၊ ကုမုဒြာဂျာနယ် စတဲ့ သတင်းမီဒီယာများတွင် စီးပွားရေး၊ ဖွံ့ဖြိုးတိုးတက်ရေး အကြံပြုအင်တာဗျူးများအား စီစဉ်ဆောင်ရွက်ပေးလျှက်ရှိပါသည်။

အင်တာဗျူးလိုသော သတင်းမီဒီယာများအနေဖြင့် EntrepreneurSME.com (09 788 888 434) သို့ ဆက်သွယ်နိုင်ပါသည်။

 

Share this Post: